2Cor 8 | GbrGAW | STEP | Nsayi mi ye ma gna fye ɓo, Shekwoyi ku zhin ga ikklisiya Makidoniya dna nwo alheri.

2 Corinthians 8

Amakidoniyayi Nku Nyaga

1 Nsayi mi ye ma gna fye ɓo, Shekwoyi ku zhin ga ikklisiya Makidoniya dna nwo alheri.

2 Kwo shi kwo nyi ɓa fi lo n wahala nsa nukwoyi, ɓa ku oɓa bugba buyi gmaje nɓa sangyi-yi, deye kwoi zhin ɓa, ɓai mi ɓa ga nyaga, ntu azaje ɓo nbugbayi gmanyi. 3 Ɓa to ga nyaga ye ngye shi oɓa nyabwa lo num, ama ɓa ga kwo ndutu, mi ga saida ge, ɓa zhin lo nu ntu ge oɓa bugba ɓeye nu, ɓa to zhin kwo ntu mi gna-gna ɓo num. 4 Har ma ɓai gyi yi wye ge, yi gwo agyiwye ye, ntuge ɓahin ɓa dnabwa n na Yesu-viyi bmazhin ɓo, dna Urushelima. 5 Ɓemanayi du-duyi nɓa zhin, har ndu ngye shi eyi awyetu ɓei nyi, kwo nu ge, ɓa ku ɓahin tukwo ga n Shekwoyi akun ɓedo n yi, ntu ge ya dna ɓa n zokwo ngye shi Shekwoyi ɓa wu yi. 6 Ɓa ɓei zhin kwo n bugba bui-buyi, har ya tnu n Titus yi, n wo ɓei gafye bugba kala dna n nyaga kmisunyi nyi, wa ɓe fye aba, wa ga fye bugba kala, n na bai fya nu fye rabo dna tnu-tnu nyaga nya ye.

7 Fye zhin aza dnagmayi nu na zokwoyi mwa begye, fye n gaiciya gai lo, a waʼazi zhin yi manayi, a ɓeye-kpeyi mwa, n pwawo bmazhin nya, n ye-yeyi mwa ntu yi ɓo. Nsayi ye mi ye fya ze aza dnagmayi dna n zafun nyaga nya. 8 Mita ga fye wyidna num, mita ci ge tilas fya zhin n lo num, ama a wo azaje pwa lo n zhin yi. Zokwo nyi n kwo ɓa wu ge ofye ye-ye zhin ɓehin-hin nya nu, kwo du ɓeda asan lo.

9 Fye kpe lo shi eyi Dagayi Yesu ɓei nu n ye-yeyi, n na aza bmazhin yi. Kwo shi kwo nyi wo zhin nyabwa-yi nu, ama wa ze wyekwoyi nabayi, dna n wo awyekwo wa ze fye a nyabwayi.

10 Mi ga fye shaula ge, fye zo oɓo zhin n fye ɓei ya zhin eye bwigyi n kwa duya nyi, gama ofye nu to zhin kmisunyi n fye ɓei ɓe n nubozhinye pya yin, ama ofye nu zhin aza kmisunyi n fye ɓei ya ce zhin. 11 Shi fya ya ɓeye n bugba pwawo yi nyi, fye zhin kwo har fya zo n bugba bui-buyi, fyei ga enya n fye ɓa mi, dna n nyaho-nyahoi n fye n cei lo, ofye yaya pwawo, kwa wu dai-dai n fye aɓe zhin yi. 12 Ngye a kufye pwawo lo, fya ga nya, to, kwo to zhin nyaho nu shi fya ga n sun, Shekwoyi ye fya ga enya nfye n ceilo nu, wo ta ye fya ga nya nu n fye to n cei lo n.

13 Mita da lonu ge, aza nɓa gwo fye nya ga, ɓa bwa sauki, atu fye da akaya num. 14 Ama gye ga ɓa, ngye shi fye cei lo nsayi ye nmwa nyi, nwyihoyi ɓahin ɓo gafye esa nɓa cei lo nmwa, n sa yi nfya fi nsangyi, kwo ɓa ze ngye fya gna dai-dai. 15 Ho pa aya ɓo lo nɓa ci ge, “Oza nwo ɓei yezhi nmwa, nya to ɓei ce wo shim, oza njesun nwo ɓei yezhi fyewyi wo to ɓei gyisan m?”

16 Mi zhin Shekwoyi godiya lo shi wa ga Titus bugba efye ɓopa nya, shi mi n cei lo nyi. 17 A da wo lo wa vi mi shaula zhin, nge wo ɓe fye aba njesun, ama mi gyelo n gye wo ɓei ɓa ɓe koto miyi a gnawon, gama awo wo pwalo ngye wo ɓe wa gye fye. 18 Mi tunlo n gnisun nwoyi zado, ye-yeyi, Nabari manayi waʼazi zhin dna n na ikklisiya vinya. 19 Ɓehin-hin, a ikklisiya nu ɓei kni zagye, wa zan ngnisun n mi yi, yalo n na nya gayi n Urushelima, deye ɓa la Shekwoyi tu, kwa wu eyi pwawo ntu azaje bmazhin ɓo. 20 Eyi zan-zan n kun-sun Ba wu eyi gaiciya, oza ta da ɓeda kasa tu n yi tukwon, gama yi to n cei pmalo zaho wa bwa laifi tu n yi tukwon, dna n zokwo n yi shi anyaga ye nyim. 21 Shekwoyi kpelo shi gaiciya sun. Mi n cei pmalo aza vinya ɓa kpece, cenu a zhin yi zhin shiri deye.

22 Mi tnu fye lo n eyi zado yi n yi kpewoyelo da ɓemana zhin ɓo nyi. A wo wo pwalo wa ɓe, gama mikun gnawo shi fye pwawoi lo ntu bmazhin ɓo. 23 N oza nya fye ge nyikadonu zhin Titusʼa? Fya gna ge, wo zhin omi zadonu, omi bmazhinyi dna nfye bmazhin, fya gna nge azaje ngun aba zhin wakili nu a ikklisiya nya, ɓai zhin misali nu aza nɓa zhin Dagayi anya. 24 Fyewu fye ye-ye n na aza deye aba ntu mi ɓo, fya zhin ɓa enya vinya n mi gma n fyei nyi, ntuge aza vinya ɓa gye.